Iċ-Ċifri tal-2023

Sabiex sar magħruf il-bilanċ negattiv taʼ €938.9 miljun tas-settur tal-Gvern Ġenerali għall-2023, saru aġġustamenti fil-bilanċ tal-Fond Konsolidat tal-Gvern (L-Istqarrija tal-aħbarijiet tal-NSO 059/2024), li rreġistra defiċit taʼ €808.0 miljuni. L-aġġustamenti huma meħtieġa għat-tranżizzjoni mill-Fond Konsolidat tal-Gvern għall-eżerċizzju li huwa bbażat fuq id-dovuti (accruals) u li huwa kkompilat skont il-metodoloġija stabbilita. L-aġġustamenti jqisu wkoll kemm l-Entitajiet Barra mill-Estimi¹ (EBUs), li huma kklassifikati ġos-settur tal-Gvern Ġenerali, kif ukoll is-settur tal-Gvern Lokali. Tabella nru 3 tipprovdi t-tranżizzjoni mill-Fond Konsolidat għas-settur tal-Gvern Ġenerali.

L-akbar aġġustament negattiv kien jikkonċerna l-Kontijiet Oħra Rċevuti u Mħallsa li ammontaw għal €402.0 miljuni, u li fost ħwejjeġ oħra jinkludu ċ-ċifri tal-accruals tad-Dipartiment tat-Teżor, l-aġġustamenti tan-newtralizzazzjoni tal-Fondi tal-UE u l-posponimenti tat-taxxi minħabba l-Covid-19. Aġġustamenti oħra negattivi kienu l-Clearance Funds tat-Teżor (TCF) fi tranżazzjonijiet mhux finanzjarji (€11.8-il miljun), it-tranżazzjonijiet li ġew indirizzati mill-ġdid fis-settur tal-Gvern Ġenerali u l-ftehimiet għas-sħubiji bejn il-Gvern u l-privat (PPP) (€8.9 miljuni) u r-reġistrazzjoni taʼ Krediti tat-taxxa pagabbli (€6.1 miljuni).

L-aġġustamenti pożittivi ewlenin kienu t-tranżazzjonijiet fi flus kontanti aġġustati biż-żmien (€160.7 miljun) u ż-żieda fis-surplus irreġistrata mill-EBUs, li kienet taʼ €119.7-il miljun, li fissret żieda taʼ €32.5 miljun fuq l-2022. Żidiet oħra kienu d-differenza bejn l-imgħax imħallas u dovut (€10.6 miljuni), l-imgħax irċevut mis-sinking fund (€5.8 miljuni) u s-surplus aggregat taʼ €0.6 miljuni tal-Gvern Lokali.

Rappurtar u aġġornamenti

Fit-30 taʼ Settembru 2024, Malta ssottimettiet il-livelli tad-defiċit u d-dejn tal-Gvern għas-snin 2020-2023, bħala parti mill-Proċedura tan-Notifikazzjoni tad-Defiċit Żejjed (EDP). Dan sar skont ir-Regolament tal-Kunsill (RK) Nru 479/2009, kif emendat mir-Regolament tal-Kummissjoni (UE) Nru 220/2014.

Meta mqabbel mas-sottomissjoni taʼ qabel, li kienet saret fit-28 taʼ Marzu 2024, id-defiċit tal-Gvern Ġenerali kien rivedut ʼl isfel għas-snin kollha taħt il-lenti, bir-reviżjonijiet ewlenin ikunu fl-2023 (-€11.5m), l-2022 (-€10.3m) u l-2021 (-€5.6m). Ir-reviżjoni ewliena kienet ġejja minn data aġġornata taʼ Krediti tat-taxxa pagabbli fl-2022 (-€8.7m) u l-2023 (-€14.4m).

Barra minn hekk, id-disponibbiltà tal-kontijiet awditjati tal-EBUs u l-Gvern Lokali wasslet għal reviżjoni ʼl isfel fil-bilanċ fiskali, li ammonta għal €0.8 miljuni fl-2020, €5.8 miljuni fl-2021, €1.8 miljun fl-2022, u €0.1 miljun fl-2023.

Ir-reviżjonijiet fid-Dejn tal-Gvern Ġenerali kienu minħabba l-inklużjoni tal-imgħax pospost tal-Faċilità għall-Istabbilità Finanzjarja Ewropea (EFSF), bħalma ġara bid-disponibbiltà tal-kontijiet awditjati tal-EBUs u l-Gvern Lokali. Bʼriżultat taʼ dan, iċ-ċifri tad-Dejn ġew riveduti ʼl fuq bi €8.7 miljuni għall-2020 u €9.7 miljuni għall-2021, bʼreviżjonijiet aktar sinifikanti taʼ €11.2-il miljun u €23.6 miljun għall-2022 u l-2023, rispettivament.

Aġġustamenti fl-istock-flow (SFA)

L-SFA, li huwa wkoll magħruf bħala l-aġġustament tad-defiċit u d-dejn, jaqbad dawk it-tranżazzjonijiet jew fatturi li jaffettwaw id-dejn tal-Gvern imma li ma jkunux jidhru fil-bilanċ fiskali tal-Gvern. SFA taʼ -0.8 fil-mija tal-PDG kien irreġistrat fl-2023. Dan jindika li d-defiċit taʼ 4.5 fil-mija tal-PDG żdied bʼaktar mill-bidla tad-dejn tal-Gvern taʼ 3.8 fil-mija tal-PDG. L-SFA negattiv kien ġej l-aktar mit-tnaqqis fil-Kontijiet Oħra Rċevuti u Mħallsa (2.6 fil-mija tal-PDG) u fis-Self (0.3 fil-mija tal-PDG). Mill-banda l-oħra, kien hemm żidiet fiż-żamma tal-Munita u d-Depożiti (1.7 fil-mija tal-PDG), fl-Ishma fʼfondi taʼ investiment (0.2 fil-mija tal-PDG) u fiż-żamma taʼ Titoli tad-Dejn (0.2 fil-mija tal-PDG) (Tabella nru 4).

Aktar Tagħrif

Fʼdin l-istqarrija, id-data hija ppreżentata fuq il-bażi tad-dovuti, bʼkuntrast mal-istqarrijiet taʼ kull xahar dwar iċ-ċifri tal-finanzi tal-Gvern, li jirriflettu l-Fond Konsolidat tal-Gvern u huma ppreżentati fuq il-bażi tal-ħlas. Dan l-eżerċizzju huwa kkompilat skont il-Manwal dwar id-Defiċit u d-Dejn tal-Gvern u Is-Sistema Ewropea tal-Kontijiet Nazzjonali (ESA) 2010 (l-edizzjoni tal-2023). Hija tkopri s-settur tal-Gvern Ġenerali, li jinkludi fih ʼl Gvern Lokali, l-Entitajiet Barra mill-Estimi, u l-Gvern Ċentrali li għandu xʼjaqsam mal-estimi. Huma inklużi wkoll kontijiet oħra tal-Gvern, bħall-Clearance Fund tat-Teżor u s-Sinking Fund, flimkien mal-Fond Konsolidat. Tranżazzjonijiet finanzjarji huma esklużi, u aġġustamenti oħra fuq il-bażi tad-dovuti huma inklużi.

It-Tabelli tan-notifika uffiċjali tal-EDP li kienu mgħoddija lill-Kummissjoni Ewropea jinstabu fit-tabelli tal-Excel.

Id-data tal-Fond Konsolidat tal-Gvern jinstabu hawn: online.

Aktar tagħrif kemm dwar il-kategoriji tad-dħul u n-nefqa u kemm dwar l-assi u l-obbligazzjonijiet finanzjarji u d-dejn, kien maħruġ illum fl-Istqarrija dwar ‘Il-Kontijiet taʼ Kull Tliet Xhur tas-Settur tal-Gvern Ġenerali: K2/2024’. Din tinstab hawn:

L-Istqarrija tal-Aħbarijiet  dwar Il-Kontijiet taʼ Kull Tliet Xhur tal-Gvern Ġenerali: K2/2024.

L-Inventarju Konsolidat tas-Sorsi u l-Metodi tal-EDP fl-ESA 2010 jinsab fis-sit elettroniku tal-NSO. Id-dokument jistaʼ jintlaħaq minn hawn:

EDP Consolidated Inventory of Sources and Methods in ESA 2010.