L-Istħarriġ tal-Infiq tad-Djar: FAQs
DWAR L-ISTĦARRIĠ
Għal xiex jiswaʼ l-Istħarriġ dwar l-Infiq tad-Djar (HBS)?
L-HBS huwa mmexxi mill-NSO maʼ djar privati fʼMalta u Għawdex. Dan l-istħarriġ jgħinna nifhmu kif intom tonfqu, tfaddlu, u tikkunsmaw. Billi taqsmu magħna d-drawwiet tal-infiq tagħkom tkunu qed tgħinu biex isiru deċiżjonijiet siewja dwar il-ħarsien soċjali u t-tkabbir ekonomiku.
Għan ewlien tal-HBS huwa l-aġġornament tal-Indiċi tal-Prezzijiet bl-Imnut (RPI), li jkejjel it-tibdil fil-prezzijiet u l-effett tal-inflazzjoni fuq il-baġits tal-familji. Ir-riżultati huma meħtieġa għall-ippjanar, il-politika, u monitoraġġ.
Xʼinhu magħdud fʼdan l-istħarriġ?
Id-djar sa jkunu mitlubin jagħtu tagħrif dwar l-għamla, id-demografija, l-impjiegi, id-dħul, l-infiq, l-akkomodazzjoni u l-faċilitajiet tal-akkomodazzjoni, l-oġġetti tal-konsum li jservu fit-tul (bħalma huma l-vetturi), u oġġetti oħra finanzjarji u taʼ nfiq tad-dar. Id-data sa tkun miġbura bi kwestjonarju ewlieni u djarju taʼ ġimagħtejn.
Xʼgħandi nagħmel jekk insib diffikultà biex nimla d-djarju u l-kwestjonarju?
Fʼkaż taʼ diffikultà, inti ġentilment mitlub tfittex l-għajnuna mingħand l-Intervistatur mogħti lid-dar tiegħek. Jekk tkun teħtieġ aktar għajnuna, tistaʼ tkellem lit-Taqsima tal-Ġbir tad-Data bʼemail [email protected] jew telefown 25997380 (Mit-Tnejn sal-Ġimgħa mid-09:00 sat-15:00).
Il-PARTEĊIPAZZJONI
Il-Parteċipazzjoni hija taʼ bilfors?
Iva. Il-parteċipazzjoni fl-HBS hija taʼ bilfors kif stipulat bl-Att dwar l-Awtorità tal-Istatistika taʼ Malta, 2000.
Min huwa eliġibbli li jieħu sehem fl-istħarriġ?
Il-parteċipanti tal-HBS huma magħżulin bil-polza. Dawn huma djar privati li huma magħmulin minn membri li jkollhom status taʼ resident (li jgħixu, jew għandhom ir-rieda li jgħixu, Malta għall-perjodu taʼ mill-inqas 12-il xahar).
Kif sa nkun naf jekk ingħażiltx?
Djar fil-kampjun sa jirċievu ittra uffiċjali li tgħarrafhom li jkunu ngħażlu biex jieħdu sehem. Barra minn hekk, wieħed mill-Intervistaturi tagħna sa jikkuntattjakom biex jagħtikom tagħrif dwar l-istħarriġ u jagħmel appuntament magħkom biex imexxih.
Jekk id-dar tiegħi tkun ingħażlet, min għandu jimla d-djarji?
Kull dar sa tkun mogħtija żewġ djarji, li jkopru perjodu taʼ ġimagħtejn, li fihom jitniżżel l-infiq regolari. L-intervistatur mogħti lil dar partikulari għandu jagħtiha t-tagħrif kollu meħtieġ dwar kif għandhom jimtlew dawn id-djarji. Huwa fʼidejn id-dar li tara lil min sa tafda biex timla u tagħti t-tagħrif meħtieġ.
Jiena mʼiniex ċittadin Malti, xorta waħda għandi nimlieh?
Il-parteċipazzjoni mhix imsejsa fuq iċ-ċittadinanza, imma fuq l-istatus taʼ residenza. Id-data sa tkun mitluba mingħand djar privati li jingħażlu bil-polza, li l-membri tagħhom ikollhom status taʼ residenti (li jgħixu, jew għandhom ir-rieda li jgħixu, Malta għall-perjodu taʼ mill-inqas 12-il xahar).
Jekk ingħażilt, kif ħa nieħu sehem?
Id-data sa tinġabar bi kwestjonarju ewlieni u djarju taʼ ġimagħtejn.
Wieħed mill-Intervistaturi tagħna sa jikkuntattja lid-dar biex jagħti tagħrif dwar l-istħarriġ u jagħmel appuntament magħkom. Fl-ewwel viżta, l-Intervistatur jagħti żewġ djarji lid-dar, wieħed għal kull ġimgħa taʼ riferenza, u jfissrilkom kif għandhom jimtlew. Id-djarji huma mistennija jimtlew mill-membri tad-dar, għad illi l-intervistaturi sa jgħinu lid-djar skont il-ħtieġa. L-Intervistatur mogħti lid-dar tagħkom sa jżurkom għat-tieni darba biex jara li d-djarju jkun qed jimtela sewwa u jagħmlilkom il-kwestjonarju ewlieni. L-Intervistatur sa jżurkom għat-tielet darba, fi tmiem il-perjodu taʼ ġimagħtejn, biex jiġbor id-djarji.
Matul il-ġbir tad-data għall-kwestjonarju ewlieni, li sa jimtela mill-Intervistaturi, id-djar sa jkunu mitluba jagħtu tagħrif dwar l-għamla, id-demografija, l-impjiegi, id-dħul, l-infiq, l-akkomodazzjoni u l-faċilitajiet tal-akkomodazzjoni, l-oġġetti tal-konsum li jservu fit-tul (bħalma huma l-vetturi), u oġġetti oħra finanzjarji u taʼ nfiq tad-dar tagħhom.
Fid-djarji, id-djar parteċipanti huma mitlubin jirrappurtaw l-infiq tagħhom ġurnata bʼġurnata, u nfiq ieħor li jinqalaʼ, fuq perjodu taʼ ġimagħtejn. L-għan ewlien tad-djarji huwa li jinġabar it-tagħrif tal-prodott bħall-prezz, il-kwantità fiżika, u l-postijiet tax-xiri. Id-djar parteċipanti għandhom iniżżlu x-xiri kollu tal-jum fid-djarji matul il-perjodu taʼ ġimgħatejn li jibda fl-ewwel Tnejn tal-perjodu taʼ riferenza. Għal dan il-għan, is-sena li matulha qed isir dan l-istħarriġ hija maqsuma fʼperjodi taʼ ġimagħtejn. Bʼhekk, kull ġimgħa, grupp taʼ djar sa jkun qed jibda l-biċċa xogħol tiegħu filwaqt li grupp ieħor ikun qed itemma.
Kif ħa nsewwi żball fid-djarju?
Jekk jogħġobkom, evitaw l-użu taʼ likwidu taʼ korrezzjoni. Fʼkaż taʼ entraturi ħżiena fid-djarju, bħal oġġetti li jitniżżlu ħażin (jew fil-jum ħażin jew fit-taqsima, jew żbalji fid-deskrizzjoni, il-prezz, il-kwantità, jew il-piż), l-entratura l-ħażina għanda tinqataʼ u titniżżel l-entratura t-tajba kif imiss.
Il-parteċipanti sa jirċievu xi ħaġa bħala radd il-ħajr?
Bħala apprezzament tal-ħin u r-responsabbiltà li d-djar parteċipanti jkunu ħadu biex jagħtu t-tagħrif mitlub, huma sa jingħataw €50.
IS-SIGURTÀ U L-KUNFIDENZJALITÀ
Kif ħa tkun imħarsa d-data tiegħi?
Il-ħarsien tad-data hija prijorità għall-NSO. Id-data kollha miġbura sa tintuża biss għall-ħtiġijiet tal-istatistika uffiċjali u sa tkun imħarsa skont il-politiki interni, il-leġiżlazzjoni nazzjonali u Ewropea. Barra minn hekk, id-data tinxtered u tkun ippubblikata f’forma aggregata mingħajr riskju ta’ identifikazzjoni tad-dar jew tal-individwu. L-istaff tal-NSO u l-intervistaturi kollha tal-istħarriġ jingħataw ġurament ta’ segretezza. Barra minn hekk, l-aċċess għad-data huwa fuq bażi ta’ ħtieġa ta’ għarfien u għalhekk il-ħaddiema tal-NSO m’għandhomx aċċess għad-data tal-unitajiet domestiċi.
Kif sa nkun naf li l-intervistatur huwa mill-NSO?
Jekk ikollok dubju, inti tistaʼ titlob lill-Intervistatur biex jaqralek in-numru taʼ riferenza li jidher fl-ittra uffiċjali li tkun irċevejt. Barra minn hekk, inti tistaʼ tkellem lit-Taqsima tal-Ġbir tad-Data bit-telefown fuq 25997380 (Mit-Tnejn sal-Ġimgħa mid-09:00 sat-15:00) biex tivverifika s-sors taʼ min ikun ċempillek.
