Il-‘Malta Blue Books’ jmorru lura għal żmien l-Amministrazzjoni Brittanika tas-sekli 19 u 20. L-imperu Brittaniku kellu livelli għolja għall-ġbir u d-disponibbiltà ta’ informazzjoni dwar diversi aspetti tal-ħajja fil-kolonji tiegħu. Fil-fatt, jista’ jingħad li l-‘Malta Blue Books’ kienu l-aktar mezz importanti waħdieni ta’ informazzjoni fil-kolonji u d-dominji. L-NSO għandu damma tagħhom li tħabbatha sewwa ma’ dik tal-Arkivji Nazzjonali tal-Imdina.

Il-volumi fihom statistika bir-radam: popolazzjoni; statistika vitali; importazzjoni u esportazzjoni; taxxi; dazju u għejun oħrajn ta’ dħul; proġetti ta’ infrastruttura, nefqa ċivili u militari, edukazzjoni; sptarijiet; is-sistema penali; u statistika dwar il-klima. Xi ‘Blue Books’ fihom materjal illustrattiv distintiv ħafna. Dan jista’ jvarja minn akkwarelli ta’ flora lokali sa mappi u pjanti ta’ toroq.

Il-proġett ta’ diġitizzazzjoni li daħal għalih l-NSO kien telaq minn għotja tal-UE. Sa meta l-għotja kienet waslet fi tmiemha, proporzjon ta’ volumi kien diġitizzati u mqiegħda online. Issa l-għadd sħiħ ta’ 116-il volum jista’ jkun ikkonsultat online, u b’hekk ikunu qegħdin jagħtu servizz filwaqt li l-kotba oriġinali jkunu franki mit-tkagħbir.

Dan il-proġett seta’ jsir bil-kooperazzjoni kontinwa tal-Arkivji Nazzjonali ta’ Malta.