Meta mqabblin mas-sena ta’ qabel, il-libreriji pubbliċi fid-distretti tal-Punent u t-Tramuntana rreġistraw l-akbar żjidiet fit-tislif tal-kotba, bir-rati ta’ 20.0 fil-mija u 19.8 fil-mija rispettivament. FʼGħawdex, il-biċċa l-kbira tat-tislif kien rreġistrat fil-librerija pubblika tar-Rabat bʼ29,061, segwit mil-librerija pubblika tan-Nadur b’17,193 tislifa (Tabella nru 3).
Il-libreriji reġjonali f’Ħ’Attard u Ħaż-Żebbuġ kellhom ħafna miż-żjieda fit-tislif tal-kotba fost il-libreriji tad-distrett tal-Punent, b’tali mod li flimkien kellhom aktar minn nofs iż-żjieda f’dan id-distrett fl-aħħar sena. B’riferenza għad-distrett tat-Tramuntana, il-libreriji pubbliċi tal-Mosta u n-Naxxar irreġistraw il-biċċa l-kbira tat-tislif bir-rati taʼ 49.7 fil-mija u 14.7 fil-mija tal-għadd kollu fid-distrett, rispettivament. (Tabella nru 3).
Min-naħa l-oħra, il-libreriji pubbliċi tad-distrett tax-Xlokk irreġistraw tnaqqis ta’ 4.7 fil-mija fit-tislif tal-kotba. Meta mqabbel mas-sena ta’ qabel, l-akbar tnaqqis fit-tislif tal-kotba mil-libreriji pubbliċi kien irreġistrat fl-Imqabba bʼ27.9 fil-mija. Min-naħa l-oħra, fl-istess distrett kienet irreġistrata żjieda ta’ 52.4 fil-mija fit-tislif mil-librerija pubblika ta’ Ħal Kirkop (Tabella nru 3).
Fl-2022, il-libreriji pubbliċi kisbu 32,124 ktieb, li huwa tnaqqis ta’ 16.3 fil-mija meta mqabbel mas-sena ta’ qabel. L-akbar tnaqqis kien irreġistrat fit-tiksib tal-kotba diġitali li naqsu b’77.4 fil-mija. Warajhom, kien hemm d-donazzjonijiet tal-kotba bi tnaqqis ta’ 16.1 fil-mija. Min-naħa l-oħra, meta mqabblin mas-sena ta’ qabel, il-libreriji pubbliċi rreġistraw żjieda ta’ 14.7 fil-mija fil-ksib tal-kotba permezz tax-xiri (Tabella nru 1).
Fl-2022, il-membri l-ġodda tal-libreriji pubbliċi laħqu l-5,947, liema ċifra hija żjieda ta’ 73.1 fil-mija meta mqabbla mas-sena ta’ qabel. Bl-istess mod, is-sehem ta’ persuni taħt l-età ta’ 18-il sena fost il-membri l-ġodda tal-librerija tela’ minn 52.1 għal 56.5 fil-mija (Tabella nru 2).
L-għadd ta’ kotba u rivisti li waslu għand il-Librerija Nazzjonali ta’ Malta b’depożitu legali laħaq it-881, li huwa tnaqqis ta’ 11.0 fil-mija meta mqabbel mal-2021. Is-sena li għaddiet, in-numru ta’ kotba qabeż in-numru ta’ rivisti (Tabella nru 4).
L-istatistika tal-kummerċ internazzjonali wriet li, is-sena li għaddiet, kemm l-importazzjoni kif ukoll l-esportazzjoni ta’ materjal stampat ta’ kotba u rivisti żdiedu. L-importazzjoni żdiedet b’21.9 fil-mija, filwaqt li l-esportazzjoni żdiedet bi 8.2 fil-mija (Tabella nru 5). Fl-istess ħin, it-tagħrif tal-Kontijiet Nazzjonali wera li n-nefqa totali tal-konsum finali privat fuq il-kotba; u l-gazzetti u r-rivisti żdiedet b’10.6 fil-mija u 2.4 fil-mija, rispettivament (Tabella nru 6).