In-Nefqa tal-Gvern Ġenerali bil-Funzjoni Tagħha: 2024
Din l-istqarrija tal-aħbarijiet tagħti tagħrif dwar il-klassifikazzjoni tal-funzjonijiet tal-Gvern (COFOG), li hija l-metodoloġija użata biex tkun analizzata l-istruttura tan-nefqa tal-gvern.
Fl-2024, in-nefqa sħiħa tal-Gvern Ġenerali żdiedet b’€1,154.3 miljun fuq l-2023 biex laħqet it-€8,640.6 miljun. Il-Ħarsien soċjali kienet in-neqfa ewliena u laħqet l-€2,258.5 miljun, żieda ta’ €259.9 miljun fuq l-2023, biż-żieda ewlenija rrappurtata fil-benefiċċji soċjali (€185.2 miljun).
B’kollox, intefqu €1,753.2 miljun fuq l-Affarijiet ekonomiċi, żieda ta’ €267.8 miljun fuq l-2023. Dan inkluda l-€156.0 miljun mogħtija lil-linja nazzjonali tal-ajru bħala sehem il-Gvern, li minflok kienu kklasifikati bħala trasferimenti kapitali. Intefqu wkoll €235.3 miljun f’sussidji u €115.0-il miljun oħra fuq l-infrastruttura tal-enerġija. L-infiq sħiħ fuq is-Saħħa kien ta’ €1,155.2 miljun. Dan kien segwit mill-infiq fuq is-Servizzi pubbliċi ġenerali u l-Edukazzjoni, li ammontaw għal €1,146.3 miljun u €1,092.1 miljun, rispettivament.
Iż-żieda fin-nefqa fuq is-Servizzi pubbliċi ġenerali kienet ġejja l-aktar minn nefqiet ogħla fuq il-konsum intermedju (€50.9 miljun), id-dħul mill-Proprjetà (€50.9 miljun) u trasferimenti kurrenti oħra (€50.5 miljun). In-nefqa fuq l-Edukazzjoni kibret b’€229.0 miljun, it-tielet l-akbar żieda, u kienet ġejja l-aktar miż-żieda fil-Kumpens tal-impjegati (€126.6 miljun), li rriżultat mill-ftehim kollettiv ġdid f’dan il-qasam (Tabelli nri 1 u 4).
Fl-2024, l-akbar biċċa min-nefqa tal-Gvern Ġenerali marret fuq il-Ħarsien soċjali bʼsehem taʼ 26.1 fil-mija tan-nefqa sħiħa, tnaqqis taʼ 0.6 taʼ punt perċentwali fuq l-2023. Wara dan kien hemm l-Affarijiet ekonomiċi (20.3 fil-mija), is-Saħħa (13.4 fil-mija), is-Servizzi pubbliċi ġenerali (13.3 fil-mija), u l-Edukazzjoni (12.6 fil-mija). Id-Difiża u l-Akkomodazzjoni u l-kumditajiet tal-komunità kellhom l-inqas sehem min-nefqa kollha, b’1.4 u 1.7 fil-mija, rispettivament (Tabella nru 2).
Bħal fis-snin ta’ qabel, analiżi tan-nefqa tal-Gvern Ġenerali skont il-funzjoni għall-2024 turi li biċċa kbira tan-nefqa tal-gvern kienet magħmula fuq il-Kumpens tal-impjegati (25.8 fil-mija), il-Benefiċċji soċjali fi flus jew għamliet oħrajn (21.2 fil-mija), il-Konsum intermedju (19.8 fil-mija) u l-Formazzjoni tal-kapital gross (8.5 fil-mija) (Tabella nru 4).
Tabella nru 5 taqsam fid-dettall in-nefqa tal-Gvern Ġenerali billi teżamina l-funzjoni tat-tieni livell tal-klassifikazzjoni COFOG. L-akbar sehem tan-nefqa tal-gvern intefaq fuq ix-Xjuħija (€1,366.4 miljun), li tirrappreżenta 15.8 fil-mija tan-nefqa kollha tal-Gvern Ġenerali. Dan kien segwit min-nefqa fuq is-Servizzi tal-isptar, li laħqet €646.4 miljun, jew 56.0 fil-mija, tan-nefqa kollha fuq is-Saħħa. Barra minn hekk, parti konsiderevoli mill-infiq tal-Gvern Ġenerali mar fuq it-Trasport (€636.6 miljun), li kien segwit min-nefqa ta’ €617.0-il miljun u €430.0 miljun fuq Organi eżekuttivi u leġiżlattivi, Affarijiet finanzjarji, fiskali u esterni, u Fjuwil u enerġija, rispettivament.
Ċart nru 1. In-nefqa tal-Gvern Ġenerali bil-funzjoni tagħha: 2020-2024
fʼeluf tal-ewro
Ċart nru 2: In-nefqa tal-Gvern Ġenerali bil-funzjoni tagħha bħala % tan-nefqa kollha